LTFF HAMOSU JOGADORA FOUN BA SELESAUN NASIONAL FETO

Futebolista sira ne’ebé mellor mosu husi kompetisaun, no eventu futebol ida-ne’ebé organiza hodi fó biban ba jogador sira, hodi hatudu sira-nia kapasidade jogu iha kampu kada tinan.

Iha epoka LTFF – Liga Timorense de Futebol Feminino - 2021 ne’e organiza ho esperansa, katak kompetisaun ida-ne’e bele hamosu jogadora di’ak sira ba selesaun nasionál femininu, hodi reprezenta Timor-Leste iha torneiu sira internasionál iha futuru.

“Ita organiza kompetisaun ne’e, iha kedas hanoin, atu hetan selesaun nasionál femininu, tanba futebol la’ós ona ba maskulinu de’it. FIFA hahu promove ona feto iha mundu futebol, no ninia asosiasaun membru sira tenke promove mós futebolista feminina liuhusi kria torneiu ba feto sira.”   Dehan Gelasio Carvalho da Silva, diretor kompetisaun, iha FFTL foin lalais[13/10].

Tuir Gelasio, FFTL kria liga futebol femininu ho objetivu atu promove jogadora sira iha rai laran no sira ne’ebé di’ak sei hili ba ekipa nasionál feto, hodi prepara ba kompetisaun sira iha nivél rejionál no mós internasionál.

Nia mós adisiona, Timor-Leste durante ne’e menus tebes iha futebolista-feminina tanba kompetisaun ba feto sira hanesan ne’e laiha, maibé kompetisaun ida-ne’e bele produs jogadora sira no sira-ne’ebé di’ak-liu sei hetan selesaun.

“Tinan hirak liu ba, FFTL la organiza kompetisaun hodi promove feto sira iha futebol. Liga Feto no Kopa Rosa Muki hahu iha tinan 2020. Hosi kompetisaun ida-ne’e mak treinador sira selesiona jogadora sira ba selesaun nasionál feto.” Dehan tan.

Diresaun Kompetisaun iha ona hanoin atu oinsá realiza mós kompetisaun juvenil feminina iha tinan oin, hahu kedas futebol femininu iha otas kiik (tuir planu sei hahu ho otas sanulu-resin-hitu )    – hodi prepara ba selesaun nasionál.

“FFTL sei organiza ida-ne’e hodi garante nafatin sustentabilidade futebolista feminina no kompetisaun ida hanesan ne’e tenke kontinua organiza.” Gelasio afirma.

FFTL la organiza kompetisaun iha sidade Dili de’it maibé mós iha torneiu sira ne’ebé organiza husi asosiasaun membru sira iha munisipiu. Iha torneiu ba jogador sira hahu iha otas sanulu-resin-neen, no torneiu ba feto sira mós realiza husi asosiasaun futebol munisipál sira. Kompetisaun sira-ne’e sempre iha prezensa husi treinador selesaun nasionál hodi halo observasaun no selesiona jogador sira husi munisipiu.

“Atu selesiona jogador sira iha kompetisaun sira hanesa ne’e, FFTL sempre fó kompeténsia ba treinador sira no ne’e treinadór sira selesaun nasionál nia kna’ar atu evalua jogador sira-ne’ebé sira fihir iha abilidade jogu no bele duni halo-parte iha selesaun nasionál.” Dehan tan.

Diresaun Kompetisaun nian funsaun maka atu kria no organiza de’it torneiu futebol sira hodi fó oportunidade ba jogador sira atu hatudu sira-nia abilidade durante jogu ida. Hanesan iha epoka 2020, FFTL konsege hetan jogadora balun ne’ebé atuál halo-parte iha selesaun nasionál. Iha epoka 2021 ne’e FFTL hamosu rekursu importante tolu ba klubu sira hanesan apoiu finanseiru, premiu ba jogu no premiu ba kampiaun. Kompetisaun ne’ebé organiza iha tinan kotuk Buibere FC mak sai kampiaun no mellor jogadora monu iha Nilda Romana [13]. Maibé epoka ida-ne’e bele iha mudansa kuandu klubu seluk posivel hada’u titulu kampiaun husi Buibere FC.   

LTFF partisipa husi klube premeira no segunda divizaun hamutuk klubu 11. Klube premeira divizaun sei hada’u malu kampiaun ho premiu $10.000,00, no troféu. Iha mós performance bonus  ho valor $1000,00 ba klubu premeira divizaun ne’ebé manan jogu.

Best Player[melhor jogador] sei hetan premiu $1000,00, Top Score [melhor marcador] sei hetan premiu $1000,00, no Best Goal Keeper [Melhor Golheiro] sei hetan premiu $1000.00. Jogu ba premeira divizaun fahe ba jornada sanulu ho total jogu hamutuk 20, ne’ebé joga husi klube lima hanesan;  FC Buibere, AD.SLB Laulara, Maranatha FC, S'amuser FC no Academia FC.

Kampiaun ba segunda divizaun hetan premiu $3000,00 no troféu. Jogu ba segunda divizaun fahe ba jornada lima ho total jogu hamutuk 15. Performance bonus ba segunda divizaun sei hetan $500,00. Segunda divizaun konsiste husi klubu neen, mak hanesan; VDL FC, UNITAL FC, Nain-Feto FC, São Jose FC, ASS. BAUCAU FC, no Maudoko FC.

Klube premeira no segunda divizaun mós hetan suporta finanseiru husi FFTL ho montante ne’ebé diferente. Kada klube husi premeira divizaun hetan $2500,00, no kada klube husi segunda divizaun hetan $1500,00.