LIGA FETO  OHIN HAHU ABERTURA

Federasaun Futebol Timor-Leste [FFTL] liuhusi Diresaun Kompetisaun, ohin iha konferensia ho imprensa, relata preparasaun abertura Liga Timorense de Futebol Femenino [LTFF] segunda edisaun ne’ebé hahu ohin tuku ha’at loro-kraik, iha estádiu munisipál Dili.

FFTL koordena tiha ona ho parte relevante sira oinsá bele realiza kompetisaun durante pandemia. Koordenasaun ne’e akontese entre FFTL, SEJD no MS hodi kria protokolu ne’ebé bele impoin durante jogu realiza.

“Ami halo tiha ona koordenasaun no enkontru triparty entre FFTL, SEJD no MS hodi implementa protokolu prevensaun pandemia Covid-19. Komisaun prepara ona atu realiza abertura iha loron ohin hahu tuku ha’at, iha estádiu munispál Dili.” Dehan Diretor Kompetisaun Gelasio da Silva iha konferensia imprensa ohin dader.

Gelasio mós adisiona, komisaun impoin regra ne’ebé rigorozu hodi asigura partisipasaun adeptu sira no mós jogador sira durante jogu. Komisaun Organizadora preparadu atu hala’o jogu ne’e durante pandemia.

“Iha abertura ne’e ami halo ajenda simples de’it, la autoriza adeptu sira-ne’ebé la vasina, teste swab ba jogador sira ne’ebé seida’uk to’o tinan atu simu vasina no mós teste temperatura ba jogador sira, inklui mós adeptu sira-ne’ebé simu ona vasina doze kompletu.” Dehan tan.

Torneiu LTFF partisipa husi klube premeira no segunda divizaun hamutuk klubu 11. Klube premeira divizaun sei hada’u malu kampiaun ho premiu $10.000,00, no troféu. Iha mós performance bonus  ho valor $1000,00 ba klubu premeira divizaun ne’ebé manan jogu.

Best Player[melhor jogador] sei hetan premiu $1000,00, Top Score [melhor marcador] sei hetan premiu $1000,00, no Best Goal Keeper [Melhor Golheiro] sei hetan premiu $1000.00. Jogu ba premeira divizaun fahe ba jornada sanulu ho total jogu hamutuk 20, ne’ebé joga husi klube lima hanesan;  FC Buibere, AD.SLB Laulara, Maranatha FC, S'amuser FC no Academia FC.

Kampiaun ba segunda divizaun hetan premiu $3000,00 no troféu. Jogu ba segunda divizaun fahe ba jornada lima ho total jogu hamutuk 15. Performance bonus ba segunda divizaun sei hetan $500,00. Segunda divizaun konsiste husi klubu neen, mak hanesan; VDL FC, UNITAL FC, Nain-Feto FC, São Jose FC, ASS. BAUCAU FC, no Maudoko FC.

Klube premeira no segunda divizaun mós hetan suporta finanseiru husi FFTL ho montante ne’ebé diferente. Kada klube husi premeira divizaun hetan $2500,00, no kada klube husi segunda divizaun hetan $1500,00.