Kongresu FFTL 2021, Futebol Sai Icon Iha TL

Iha VI Kongresu FFTL, prezidente FFTL Francisco M.C.P Jerónimo afirma, perante Asosiasaun Futebol sira husi munisipiu tomak, ninia vontade atu dezenvolve futebol hamutuk ho organizasaun membru sira sai ‘icon’ desportu iha Timor-Leste.

Jerónimo hakarak mós iha nia lideransa lori futebol to’o ba iha munisipiu no mós postu administrativu sira. Ambisaun ida-ne’e kontempla mós iha Planu FFTL 2019-2022.

“Ita hotu hakarak atu dezenvolve futebol. Ita hotu hakarak atu futebol sai duni icon [desportu] ba timoroan hotu. Bainhira simu kna’ar nu’udar prezidente FFTL, ha’u afirma kedas katak hakarak lori futebol ba teritoriu tomak. No hakarak nafatin atu kontinua lori futebol ba iha teritoriu tomak. Nune’e futebol la’ós ema sente de’it iha sidade Dili maibé mós to’o ba iha sidade munisipál sira.” Jerónimo hatete sai iha kongresu, sábadu (24/07), Dili, foin lalais.

Iha ninia lideransa Jerónimo hakarak realiza futebol ne’ebé profesionál ba povu Timor-Leste. Vontade ida ne’e hatudu iha programa sira ne’ebé realiza durante ne’e, FFTL halo esforsu maka’as hodi dezenvolve rekursu umanu hahú husi treinadór, arbitru no mós ba match commissioner ne’ebé realiza iha fevereiru 2021, ho forma virtuál. Formasaun ba match commissioner hatudu loloos vontade atu organiza kompetisaun futebol ho profesionál iha futuru.    

Jerónimo mós rekoñese futebol ladun dezenvolve di’ak durante tinan hirak liu ba, no, liu-liu, bainhira Timor-Leste mós afeta pandemia Covid-19. Maibé FFTL konsege realiza programa sira ba dezenvolvimentu rekursu umanu no organiza mós kompetisaun iha tinan 2020. Asosiasaun Futebol sira,  ne’ebé FFTL finansia,  mós organiza kompetisaun sira iha munisipiu hodi kontinua promove futebol.  

“Ita konsege realiza atividade futebol; iha kampionatu juvenile, formasaun ba treinador, formasaun ba arbitrajen, FFTL Cup, Taça Rosa Muki Bonaparte, Liga Feto, Liga Futsal  no mós kompetisaun sira-ne’ebé asosiasaun futebol sira realiza iha munisipiu.” Kontinua Jerónimo iha kongresu da-neen ne’e. 

Sukat mós implementasaun Planu FFTL 2019-2022, ne’ebé kondus esforsu sira ba dezenvolvimentu futebol durante ne’e, ho Jerónimo nia lideransa konsege dudu futebol hakat neineik ba oin. Hafoin hateke filafali ba kotuk, halo evaluasaun ba programa sira hodi sukat progresu ne’ebé hala’o ho esforsu tomak, hatudu duni rezultadu pozitvu tebes ba dezenvolvimentu futebol iha Timor-Leste.

Iha tinan 2020, FFTL konsege promove klubu nasionál ida kompete iha rejiaun aziátika, ne’ebé reprezenta Timor-Leste. FFTL mós hakarak introdus futebol ne’ebé profesionál ba povu Timor-Leste, liuhosi estabelese lisensiamentu nasionál ba klubu sira tuir padraun ne’ebé FIFA hatuur ona. Estabelesimentu lisensiamentu nasionál impoem ona profesionalidade tanba rekezitu sira-ne’ebé nesesita atu kompleta ezije kondisaun klubu sira nian; jogador, fasilidade no finansiamentu klubu.

Maske nune’e dezenvolvimentu infraestrutura futebol seida’uk hatudu progresu, maibé FFTL kontinua esforsu atu konvense nafatin doador sira liuliu AFC no FIFA atu finansia mós projeitu dezenvolvimentu infraestrutura futebol iha Timor-Leste. Tanba kondisaun estádiu sira-ne’ebé eziste ladun favorese atu organiza jogu rejionál sira iha Timor-Leste.

“FIFA fó ona sinál pozitivu atu finansia konstruksaun estádiu Dili no mós kampu demokrásia. FFTL husu ona Governu atu atribui Estádiu Munisipál Dili hodi rekonstrui tuir padraun internasionál. Nune’e jogu rejionál sira-ne’ebé ita sai uma-nain karik [hosting game] lapresiza tan aluga no joga iha nasaun seluk, maibé bele ona realiza iha Timor-Leste. Bainhira sai uma-nain ba jogu ida, kontribui mós ba ekonomia nasionál.”  Dehan atuál ministru asuntu parlamentár ne’e.  

Jerónimo mós informa, Primeiru-Ministru Taur Matan Ruak konkorda entrega estádiu munisipál Dili ba FFTL no sei iha kontratu ho Governu atu utiliza estádiu ne’e ba tinan 20. Governu mós iha ona votande atu dezenvolve futebol, Sekretaria Estadu Joventude no Desportu sei finansia Liga Timorense no investa mós iha dezenvolvimentu rekursu umanu.

Iha kongresu ne’e mós asosiasaun membru sira aprova adesaun membru foun rua; Asosiasaun Futsal Timor-Leste (AFTL) no Asosiasaun Treinamentu Futebol Juvenil Timor-Leste (ATFJTL). Ho adesaun membru foun rua, FFTL iha asosiasaun membru hamutuk sanulu-resin-sia (19); Asosiasaun Futebol Munisipál sira (12), Asosiasaun Futebol Dili Weste, Asosiasaun Futebol Dili Leste, Asosiasaun Treinador, Asosiasaun Arbitrajen, Asosiasaun Futebol Femenino no inklui asosiasaun foun rua.