FFTL-SEJD Koopera Investimentu Iha Futebol

Federasaun Futebol Timor-Leste (FFTL) no Secretaria de Estado da Juventude e Desporto (SEJD) iha ona kooperasaun atu investe iha futebol.

Diskusaun sira ba investimentu entre FFTL no SEJD kontinua la’o, no servisu hamutuk hodi identifika sentru treinamentu sira ne’ebé estabelese liuhusi Asosiasaun Futebol iha munisipiu ida-idak.

Governu hatudu vontade polítika atu investe iha rekursu umanu, oinsá asegura sustentabilidade futebol iha Timor-Leste.

“Estratejia ne’ebé Governu iha mak hahu investe iha labarik sira hafoin to’o prestasaun nivel boot.”   Hatete SEJD, Abrão Saldanha, ba Tatoli, 6 Jullu.

Durante ne’e SEJD halo hela levantamentu ba sentru juvenil sira no ba oin iha polítika atu investe iha rekursu umanu iha futebol liuhusi sentru juvenil sira ne’ebé eziste no mós estabelese tan sentru juvenil sira iha futuru.

“Ida-ne’e mak ita servisu hamutuk ho FFTL hodi investe iha futebol, no la’ós de’it iha munisipiu Dili.” Kontinua Abrão hanesan lansa iha Tatoli.

FFTL aprezenta ona planu dezenvolvimentu futebol liuhusi diskusaun sira ne’ebé durante realiza, no hein hela desizaun polítika husi parte Governu kona-ba investimentu ne’ebé parte Governu sei halo.

“FFTL durante ne’e halo esforsu maka’as ba dezenvolvimentu futebol iha Timor-Leste. Ita iha organizasaun membru hamutuk 17, ne’ebé mak estabelesidu iha munisipiu ida-idak. Sira-ne’e mak Asosiasaun Futebol sira iha munisipiu, ne’ebé mak durante ne’e FFTL apoia hodi organiza futebol iha munisipiu.”  Sekretáriu-Jeral FFTL Nelio Isaac Sarmento informa.

FFTL mós estabelese ona iha munisipiu ida-idak sentru treinamentu sira hodi hahu dezenvolve labarik sira-ne’ebé horik talenta futebol. Maibé kondisaun sentru treinamentu sira-ne’e nesesita atensaun extra oinsá bele konsolida rekursu ba iha investimentu futebol liuliu iha infraestrutura no mós rekursu umanu.

“FFTL hein hela Governu nia vontade atu investe iha futebol. FFTL prepara ona rekursu umanu ne’ebé kualifikadu, ne’ebé mós prontu utiliza iha sentru treinamentu sira. Durante ne’e iha formasaun ba treinador sira hahu husi lisensa D no to’o ona lisensa B. La-kleur tan to’o ona A.” Nelio realsa tan. “Ita hanoin katak treinador sira la’ós de’it fó treinu labarik sira maibé mós asumi responsabilidade morál, oinsá fó atensaun mós ba dezenvolvimentu mental no liu-liu forma karáter labarik sira rasik.”   

FFTL halo esforsu maka’as tebes hodi prepara rekursu umanu, no iha futebol iha kestaun importante maka rekursu umanu no infraestrutura. Iha rekursu umanu foka ba treinamentu ba futeblista sira, formasaun ba treinador no mos arbitru sira.