FFTL-KOICA Diskute Projeitu Dezenvolvimentu Futebol

Federasaun Futebol Timor-Leste [FFTL] no Korean International Cooperation Agency (KOICA) diskute posibilidade ba dezenvolvimentu futebol ne’ebé projeta ona husi ajensia ne’e rasik.

Projetu dezenvolvimentu desportu ba labarik sira, ne’ebé KOICA aprezenta, hetan apresiasaun husi Federasaun Futebol Timor-Leste.

“Entaun, KOICA nia projeitu ida-ne’e importante tebes tanba bele tulun dezenvolvimentu futebol, no liuliu fó atensaun ba alimentasaun jogador sira; oinsa jogador sira bele hetan nutrisaun hodi kuida estamina ne’ebé di’ak.” Dehan Sekretáriu-Jerál Nelio Isaac Sarmento iha enkontru ohin (16/08). 

Iha diskusaun FFTL aprezenta mós difikuldade sira iha area futebol ne’ebé durante ne’e hasoru no oinsá FFTL bele dudu dezenvolvimentu futebol iha situasaun difisil ne’e. FFTL rekomenda KOICA atu integra mós programa nutrisaun (alimentasaun nutrisioza) hahu kedas husi labarik sira-ne’ebé tuir treinu futebol.

“Federasaun Futebol Timor-Leste durante ne’e halo esforsu maka’as ba dezenvolvimentu futebol, hahu husi programa grassroot, treinador , arbitrajen no inklui mós organiza kompetisaun sira. Maibé Federasaun Futebol Timor-Leste sei nafatin enfrenta falta fasilidade futebol.” Sekretáriu-Jerál FFTL Nelio Isaac Sarmentu relata iha enkontru ne’e.

Tuir planu, KOICA sei dezenvolve sentru desportu integradu ida iha Dili no mós posivel konstrui sentru treinamentu futebol iha munisipiu sira hodi dezenvolve liutan talentu futebol iha Timor-Leste.

Nelio mós adisiona, futebol sai ona dezportu primadona iha Timor-Leste tanba povu maioria gosta haree atividade futebol no futebol mós hetan pratika husi joven maioria, hahu husi baze to’o nasionál.

“Futebol sai ona desportu número um iha Timor-Leste, ita bele haree futebol iha ne’ebé de’it.”

FFTL konsidera KOICA nia projeitu hanesan vontade Governu Koreanu nian iha investimentu ba dezportu, no FFTL hein katak projeitu ne’e bele realiza iha futuru.