FFTL Tulun Komunidade Kakeu Laran

Ohin Federasaun Futebol Timor-Leste fó apoiu sosiál ba komunidade sira iha Aldeia Kakeu Laran, Bekora, Dili, ne’ebé durante ne’e hasoru difikuldade ba hahan.

“Federasaun Futebol Timor-Leste nia kna’ar foka ba atividade futebol. Maibé mós bele tulun maluk sira-ne’ebé presiza tulun. Ohin loron komunidade barak enfrenta problema ba aihan tanba Estadu Emerjensia no Estadu Kalamidade. Tanba ne’e, liuhusi Federasaun Futebol Timor-Leste, ami mós hakarak tulun maluk sira ne’ebé presiza tulun.” Dehan Prezidente FFTL Francisco Jeronimo bainhira entrega apoiu sosiál ba komunidade sira iha Aldeia Kakeu laran (01/06).

Koordenador Aldeia Kakeu Laran, Oscar de Araújo, relata katak komunidade iha aldeia ne’e presiza tebes tulun tanba barak mak enfrenta ona difikuldade ba hahan. Tuir nia, familia barak mak laiha ona aihan tanba sira labele book an hodi buka aihan durante implementasaun Estadu Emerjensia, Serka Sanitária no Konfinamentu Domilisiariu Obrigatóriu.

FFTL apoia foos 250 sakas no sardina 80 kaixas ba komunidade sira ne’ebé identifikadu presiza tulun. FFTL fó apoiu ida ne'e hafoin Oscar de Araújo hasoru malu ho Sekretáriu-Jerál Federasaun Futebol Timor-Leste iha 31 Maiu, hodi relata situasaun ne'ebé komunidade sira hasoru durante ne'e no mós husu apoiu hodi tulun sira.

Komunidade sira agradese tebes ho apoiu ida-ne’e, tanba bele tulun sira durante tempu hirak tuir mai.