FFTL Lori Futebol ba Labarik Sira Iha Munisipiu

Federasaun Futebol Timor-Leste [FFTL] organiza eventu futebol ba labarik sira hodi motiva labarik sira-nia interese iha futebol, no oferese mós biban hodi labarik sira hatudu sira-nia talentu.

Iha semana liu ba, departementu Grassroot organiza kampaña futebol ne’ebé involve labarik sira iha munisipiu Ainaro no Manufahi. Hahu uluk liu iha Munisipiu Ainaro, hodi organiza labarik sira partisipa iha eventu ne’e. Hafoin Ainaro, ekipa FFTL halo fali viajen ba munisipiu Manufahi hodi organiza mós atividade hanesan ba labarik sira iha munisipiu refere.

Liuhusi programa grassroots FFTL bele introdus futebol ba labarik sira hahu kedas iha idade minór, hodi labarik bele hateke sira-nia futuru tanba futebol mós ajuda forma labarik sira-nia karater, promove koñesimentu no oferese vida ekonomia ne’ebé ordináriu kuandu sai jogador di’ak iha futuru.

Iha relatóriu afirma, treinador sira organiza senáriu ne’ebé fó biban ba labarik sira hodi halimar bola iha forma ne’ebé lahanesan. Treinador sira kria estasaun sanulu-resin-rua ho atividade oioin ba labarik sira hodi fó liutan oportunidade atu bele pratika futebol.

“Ami tenta kria atividade ne’ebé bele halo sira halimar ho kontente . Atividade ne’e iha intervalu minitu ualu, ho minitu rua ba orientasaun no familiarizasaun.” Dehan Gaspar Quitão, Xefe Departementu Grassroot ba FFTL [04/08].

Programa grassroot ne’e realiza ho tulun husi Japan Football Association (JFA), ho objetivu atu promove jogador sira hahu kedas husi idade minór. Programa ida-ne’e promove hodi asigura sustentabilidade futebol iha sosiedade; jogador kontinua eziste nafatin husi tempu ba tempu.