FFTL Kontinua Profesionaliza Futebol iha Timor-Leste

Futebol ladun dezenvolve di’ak iha tinan hirak liu ba relasiona ho suporta finanseiru ne’ebé menus ba Federasaun Futebol Timor-Leste, inklui mós rekursu humanu hodi operasionaliza futebol iha teritóriu Timor-Leste tomak.

“Hamutuk ho ita boot sira, FFTL hakarak oferese futebol ne’ebé profesionál ba povu Timor-Leste.” Hatete Prezidente FFTL Francisco M.C.P Jeronimo iha enseramentu atividade formasaun treinadór ba Lisensa D, ne’ebé hala’o durante loron lima iha Xanana Sport Center, Dili.

Atividade formasaun ba treinador Lisensa D ensera ona ohin maibé formasaun hanesan ne’e kontinua hala’o nafatin hodi hakat ba lisensa A. Atividade formasaun ba treinador sai ona prioridade ba Federasaun Futebol Timor-Leste, ho mehi atu profesionaliza futebol iha Timor-Leste. Hahu kedas ho torneiu sira ba idade juvenil, mane no feto sira hotu.

“Espera katak Ita boot sira bele sai treinadór profesionál iha futuru, no hamutuk ho Federasaun Futebol Timor-Leste ita haburas futebol iha rai doben ida-ne’e.” Francisco haten iha enseramentu ohin ne’e (5/03).

Prezidente FFTL konsidera rekursu humanu mak motor ba atividade hot-hotu ne’ebé akontese, futebol sei labele dezenvolve ho profesionál iha Timor-Leste kuandu rekursu humanu iha nasaun ne’e sei mukit. Tanba ne’e, Federasaun Futebol Timor-Leste fó atensaun maka’as, ho esforsu oioin, kontinua kapasita foinsa’e sira iha atividade futebol.

Instrutór Gopal Krisna mós apresia ho foinsa’e sira-ne’ebé hatudu sira-nia vontade atu lori futebol Timor-Leste ba oin. Foinsa’e sira ne’ebé tuir formasaun treinadór ne’e partisipa di’ak tebes, ativu iha diskusaun no aprezentasaun kona-ba materia sira-ne’ebé sira simu no mós pratika kedas. Tanba atividade formasaun ne’e la’ós aprezentasaun materia de’it, maibé mós pratika kedas iha kampu.

“Ha’u kontente loos, bele fahe koñesimentu futebol ba ita boot sira durante formasaun. Ha’u husu ita boot sira aplika koñesimentu sira-ne’ebé hetan ona ne’e, hodi profesionaliza futebol iha Timor-Leste.”

Partisipante sira iha formasaun ba treinadór lisensa D ne’e hamutuk nain rua-nulu-resin ha’at (4) ne’eé inklui eis jogadór sira no mós sira-ne’ebé durante fó treinamentu ba jogadór klubu sira.