Eduardo: Kampiaun Kura Ha'u-Nia Moras

Selesaun Nasionál Sub-21 sai kampiaun ba Hasanal Bolkiah Trophy edisaun da-neen, ne’ebé realiza iha Brunei Darusalam tinan 2018.

Kampiaun ida-ne’e nu’udar premeira prestasaun ba selesaun nasionál iha torneiu futebol rejionál (Sudeste Aziátiku) dezde Timor-Leste eziste nu’udar Estadu independente ida. Hatane ka lae, treinadór ida-ne’ebé lidera selesaun nasionál sai kampiaun ba Hasanal Bolkiah Trophy ne’e?

Eduardo Pereira, treinador futebol timoroan ne’ebé dahuluk hetan prestasaun iha historia futebol Timor-Leste. Prestasaun ida-ne’e nu’udar inisiu husi ninia kareira, hanesan treinador, iha mundu futebol. Nia konsege loke adeptu futebol sira-nia matan iha rejiaun Sudeste Aziátiku no mós Kontinente Aziátiku tomak.

Maibé iha buat ida-ne’ebé treinador ne’e  rai-subar, bainhira selesaun nasionál hetan derrota husi Myanmar (0-2) molok semifinal. Eduardo hetan xoke (shock) maka’as tanba hanoin ekipa ne’ebé nia treina lakon iha jogu ne’e.

 “Ita atu ba to’o final, ita kontra Myanmar ne’e lakon. Entaun ita-nia distinu iha Myanmar, bainhira ekipa Myanmar hasoru Brunei. No ne’e halo ha’u hanoin barak, ita-nia distinu iha ekipa Myanmar, tanba ekipa Myanmar mak determina ita atu tama semifinal ka lae. Ha’u hetan atakasaun kalan ne’e. Sira lori ha’u ba ospitál.” Nia relembra akontesimentu ne’e kuandu entrevista ho media FFTL [15/07/2021].

“Depois ha’u di’ak fali, ha’u bandu atu asistente treinador no sira seluk labele fó-hatene jogadór sira, nune’e sira labele pániku. Sira kontinua treinu hodi prepara ba semifinál. Sira lahatene to’o fila.” Eduardo haktuir.  

Timor-Leste lakon duni hasoru Myanmar, maibé Timor-Leste mós halakon Brunei no konsege empata ho Tailandia, nune’e rezultadu jogu konsege lori Timor-Leste hakat ba semifinál.

“Myanmar halakon tiha Brunei. Entaun ita tama ba semifinál hasoru Singapura, ita manan tiha, no ita ba final ho Kambodia 1-0.” Haktuir.  

Iha semifinál, Timor-Leste halakon Singapura 2-1 molok hatun Kambodia 1-0 iha final Hasanal Bolkiah Trophy 2018.

“Ha’u la espera [ami hotu] katak ita bele sai kampiaun iha torneiu ne’e. Ha’u orgullu tebes, hanesan treinador timoroan iha momentu ne’ebá. Ha’u-nia moras hetan kura kedas. Ha’u sente kontente tebes ho prestasaun ida ne’e.”  Nia haktuir tan.   

Treinador sub-18 ne’e mós haktuir, nia sente responsabilidade todan bainhira premeira vez lori selesaun nasionál kompete iha rejiaun aziátiku, tanba ida-ne’e inisiu husi ninia kareira nu’udar treinador ba ekipa nasionál. Maibé selesaun nasionál konsege filafali ho troféu Hasanal edisaun da-neen no premiu osan ho montante B$20,000 (US$15,200).

 

 

 

[Media_FFTL]