Buibere FC vs S'Amuser FC Finaliza Ho Empata

Jogu defensivu ne’ebé Buibere FC hatudu hodi tenta asigura golu 1-0 ho S’amuser FC durante minutu 89 finalmente sai balansu. Maria da Conceição [4]  susesu muda rezultadu jogu iha minutu 89 liuhusi sutu falta ba golleira Buibere FC, tanba golleira lakonsege salva bola.

Maria, ne’ebé hatais kamizola númeru 4, ezekuta sutu falta hodi rezulta golu wainhira golleira Buibere FC lakonsege asigura bola ne’ebé loloos bele salva. Buibere FC ezekuta ho esforsu tomak hodi tenta hatama golu tan iha minutu ikus, hafoin golu husi S’amuser, maibé nafatin la muda golu ne’ebé hanesan.  

Buibere FC nia jogadora famoza Nilda Romana [13] nia movimentu apertadu halo nia susar lansa bola ba tarjeitu. S’amuser hala’o jogu ho asigura movimentu jogadora estrela, nune’e Buibere FC nia jogu ladun agresivu tanba jogadora ne’ebé lidera jogu hetan aperta maka’as.

Nilda Romana fó golu ida ba Buibere FC iha minutu 31 jogu premeira parte, liuhusi oportunidade ezekuta sutu falta. Golu ne’ebé Nilda produs fó surpreza ba adeptu sira, nune’e mós jogadora adversariu sira iha kampu laran. S’amuser lansa kontra-ateke barak liu durante jogu.

Buibere FC, hafoin Nilda Romana nia movimentu apertadu, Soka [9] ne’ebé joga avansada iha karuk, tenta buka leet atu produs golu. Maibé S’Amuser nia defeze forte satan ateke husi jogadora ne’e, nune’e bola lakonsege suli to’o guarda rede.   

Buibere FC, ne’ebé kampiaun ba Liga Feto no Taça Rosa Muki 2020, esforsa hatudu jogu ne’ebé furak ba nia adeptu sira no kontinua esforsu defende títulu kampiaun iha epoka ida-ne’e. Maibé adeptu sira bele nota , sai kampiaun ba  edisaun ida-ne’e lafasil, tanba Buibere FC difisil iha jogu hasoru S’amuser iha estádiu munisipál Dili, Sábadu foin lalais[21/08].  

No, seraké Nilda Romana susesu defende nia estatutu best player iha epoka ida-ne’e? Ka Nilda sei kontribui ba Buibere FC liutan? Adeptu sira kontinua observa no sei julga nia estatutu kuandu epoka ne’e finál. Tanba S’amuser mós bele balansia jogu Buibere FC ne’ebé Nilda lidera.