AD.SLB Kampiaun RMB CUP 2021

Klube Futebol AD.SLB muda istória futebol femininu iha torniu Rosa Muki Bonaparte (RMB CUP) 2021 bainhira konsege halakon Klube Futebol S’Amuser ho golu 4 - 3 iha jogu finál.

Jogu finál RMB 2021 ne’ebé realiza iha estádiu munisipál Dili, Sábadu (8/1/2022) foin lalais, AD.SLB hatudu jogu ne’ebé bonitu no domina jogu durante premeira parte. Jogadora AD.SLB Elvira da Silva (22) inisia golu iha minutu hitu hafoin kickoff.

Anina da Costa (S’Amuser FC) responde golu ne’e iha minitu 18 hodi fó rezultadu hanesan, no fó filafali espíritu jogu ba nia ekipa. Maibé Elvira da Silva lansa filafali golu daruak iha minutu 23 bainhira hetan biban iha jogu ne’e.

Golu daruak fó espíritu liutan ba ekipa AD SLB hahu jogu meiu kampu hodi domina jogu no fo presaun ba S’Amuser FC. AD SLB lansa atake bebeik hodi rezulta tan golu, Elvira konsege halo golu Hat-Trick iha minutu 41 hafoin termina jogu primeira parte.

Tama ba segunda parte, AD SLB kontinua hatudu jogu ida ofensivu hodi hatama tan golu dahat iha minutu 46 liu hosi jogadora Julia Belo (19.

Ho golu ne’e halo AD SLB Laulara FC joga ho fleksibilidade no adversáriu S’Amuser FC halo jogu ho kuidadu hodi duni atrazu ne’ebé atu bele halo empata no hadau vitória hosi AD SLB Laulara FC.

Esforsu ne’ebé S’Amuser FC halo iha duni rezultadu no iha minutu 56 jogadora S’Amuser FC liu hosi nia jogadora Cecilia Godinho (23) hatama golu daruak ba nia ekipa hodi muda skore ba 2-4. S’Amuser FC nafatin halo esforsu no hahú halo presaun ba AD SLB Laulara FC maske sei falla iha ezekusaun.

S’Amuser FC hetan oportunidade osan mean iha minutu 80 hafoin jogadora AD SLB Laulara FC halo falta iha área grandeal nune’e arbitu deside fo penalidade ba S’Amuser FC no Dolores V. Costa Silva (7) ne’ebé hetan fiar atu ezekuta bola falta ne’e falla halo golu.

Ho fallansu ne’e S’Amuser FC iha halo AD SLB Laulara FC hahu hadia jogu no komesa joga ho kuidadu atu asegura vitória ne’ebé iha.

Jogadora S’Amuser Dolores V. Costa Silva (7) selu nia failansu ne’ebé iha ho golu iha minutu 86. S’Amuser FC hahu halo atake no tranzisaun ba taktika hodi fo presaun ba nia adversáriu AD SLB Laulara FC iha minutu sira ikus maibé falla halo impata nune’e too jogu remata vitória ba AD SLB Laulara FC hodi hetan titulu kampiaun no S’Amuser FC obrigadu tur iha segundu lugar  Tasa Rosa “Muki” Bonaparte 2021.

Treinadór S’Amuser Eligio dos Santos hateten ho férias natal no tinan foun halo jogadora sira nia estamina no fizikamente tun nune’e fo mós impaktu ba iha jogu iha kampu laran.

“Ami rekoñese ho ekipa adversáriu nia forsa no maioria ami nia jogadora foin fila hosi férias nune’e estamina tun,” Eligio dos Santos dehan.

Treinadór ne’e nafatin agradese ba esforsu ne’ebé jogadora sira halo ho maximu durante jogu iha  Tasa Rosa “Muki” Bonaparte 2021.

Iha parte seluk sekretariu Jeral AD SLB Laurara FC Domingos Caero hateten kampiaun ida ne’e hatudu rezultadu hosi esforsu ne’ebé jogadora no treinadór sira halo.

Kampiaun ba Tasa Rosa “Muki” Bonaparte 2021 iha direitu ba medalla, tasa inklui osan ho montante $5.000, segundu lugar S’Amuser FC hetan medalla no premiu osan ho montante 3.000, terseiru lugar Buibere FC hetan madalla no osan ho montante $2.000, enkuantu kurtu lugar hetan deit osan ho montante $1.000.

Iha selebrasaun finál  ba Tasa Rosa “MUKI” Bonaparte 2021 ne’e komisaun organizadora FFTL ne’ebé nu’udár nain ba kompetisaun LTFF fo mós premiu ba manan nain sira segunda divizaun LTFF ne’ebé sai hanesan manan nain dahuluk ka kampiaun mak AS Baucau nune’e iha direitu ba premiu hanesan medalla, tasan no osan ho montante valor $3.000 promovidu ba primeira divizaun LTFF 2022.

Segundu lugar VDL Lahane FC simu medalla no osan ho valor $ 2.500, terseiru lugar Maudoko FC hetan medalla no osan ho valor $ 2.000, enkuantu kuartu lugar monu ba Unital FC ne’ebé iha direitu ba osan ho valor $ 1.000.

Alem de fahe tasa ba manan na’in sira hosi segunda divizaun LTFF komisaun organiza mós atribui premiu ba Top skore primeira divizaun LTFF nebé monu ba jogadora Nilda Reinaldo hosi Buibere FC, ho total golu 16, nune’e jogadora refere iha direitu ba osan ho valor $ 1.000.

Ba kategoria Best player monu ba jogadora S’Amuser Dolores V. Silva Costa, hetan mós premiu osan ho valor $1.000, ikus liu atribui mós premiu ba Best goal keeper ne’ebé monu ba jogadora Madalena Soares hosi S’Amuser ho osan $ 1.000.